மப்பு

November 28, 2013

குவா குவா எனக்கூவும்
குரல் காற்றடையும் முன்னரே
வாயில் முலைப்பால்!
பின்
அன்னை மடியில்
அத்தை மடியில்
அக்கா மடியில்
பப்பு மம்மு
தச்சி மம்மு.

கல்யாணம்
கார்த்திகை
கருமாதி

என்றெல்லாம்
வாய்ப்புத் தவறவிடாமல்

உண்டு வளர்த்தேன்!
உடல் வளர்த்தேனே!

என்றும்

மண்ணில் கிடக்கும்
பயிர் பச்சை உண்டு
மண்ணாலாகிய
விலங்குயிருண்டு

மண்ணில் பிறந்து
மண்ணில் மடியும்
யாக்கையின்
கோட்டோவியமாக
மண்ணைத்தின்று
வாயைப்பிளைக்கும்
மணிவண்ணா
உனக்கு
மப்பு தட்டப்போகிறது!

Advertisements

பெருவாழ்வை நோக்கிய பெரும் கவிதை

November 28, 2013

ஏதோவொரு சட்டம்
என்ன சட்டமென்று
யாருக்குமே தெரியவில்லை
மீறக்கூடாது என்றெல்லாம் இல்லை
விதிவிலக்குகள் விழுந்து
கொண்டேயிருந்தாலும்
புரியாமல் நடைபெறுகிறது
ஓர் சட்டம்.
கையில் கொட்டிய நீர் போல
வாழ்வு.
தாகம் தணிந்தது
என்று சொல்லவா
விடுகிறது கைகழுவும் நீர்?
குடித்து நிமிரும் முன்
குடித்ததும் இல்லை
கொடுத்தவனும் இல்லை.
குடித்தது போன்றதொரு
உணர்வைக் கொண்டு வரும்
சட்டம்.
சட்டம் பேசிக்கொண்டு
சுவரில் முட்டினால்
இரத்தம் வருகிறது.
வலி இல்லை
மரணமில்லை
நோவு இல்லை
சாவு இல்லை
என்றெல்லாம்
சொல்லிவிட்டு
ஒவ்வொன்றாய்
மண்டையைப்
போடுகிறது.
மரணமில்லாப்
பெருவாழ்வை
நோக்கி
நடைபோடும்
இவ்வுரைக்கோவை
கருங்குழியில் விழுந்துச்
சாகும், கணினிகள்
நோவுற்றுத் தணியும்
போது.
அப்போதும்
கருங்குழிக்கு
அந்தப்புரம்
சட்டம் வரும்,
விதி மீறல்வரும்.
பெருவாழ்வை
நோக்கிய
பெருங்கவிதை
வரும்!


ஒத்தடம்

October 19, 2013

தனித்தே இருக்கிறேன்.

இருமையில் இன்னும் கூடுதல் தனிமை.

என்ன? கூட ஒருவர் இருந்தால்
பேச்சுத்துணையாகலாம்,
ஆனாலும்
என்னை விட்டு
இத்தனிமை
போவதில்லை.
உடலைவிட்டு
நீங்காத நிழல் போல்.

தனிமை சோகம்தான்.
சோகமான ராகம் போல்
அழுவது சுகம் என்பது
போன்ற ஒரு சோகம்

தனித்து இருக்கும் போது
ஓரத்தில் நின்று கொண்டு
கண்ணசையும் ஒன்றையும்
இனம் காட்டத்தான் வேண்டும்.

அதுதான் ஒத்தடம்
அதுதான் கவிதை.


மரணத்தின் மொட்டு

October 17, 2013

அமிலத்தில் தோன்றிய

உயிர் நீ
அமினோ அமிலத்தில்
தோன்றிய உயிர் நீ
 
விண் கல்லெறி பட்டு
புவி உலையில் 
புடம் போட்டு 
அழுக்கை நீக்கி
அமுதைச் சேர்த்து
உருவானவள் நீ.
 
நீ உயிர்
நீ யாக்கை
நீ வாழ்வு
 
எரிதணலில்
எரிந்து
சாம்பலில்
பூக்கும்
பீனிக்ஸ் பறவை
நீ.
 
நீ உயிர்
நீ யாக்கை
நீ வாழ்வு
 
அசித்தைக் குழைத்து
சித்தைப் பூசி
செம்மையாய்
செய்த செஞ்சுடர் நீ.
 
நீ உயிர்
நீ யாக்கை
நீ வாழ்வு
 
உன்னுள் ஒரே
ஒரு சுடர் போதும்
உன்னையே உருக்கி
அமிலத்தில்
கரைத்து
சித்தை விட்டு
அசித்தை
மீண்டும்
அதனதன் 
இடத்திலிட்டு
தோன்றிய போதில்
தோன்றிய வடிவத்தில்
மீண்டும்
அமிலக்கரைசலாகி
அடுத்த முறைக்குக்
காத்திருக்கும்
 
நீ உயிர்
நீ யாக்கை
நீ வாழ்வு
 
அமிலத்தில்
உருவான நீ
அமுதம் சேர்ந்த 
போழ்தில் நீ
ஆருயிர் காட்டி
நின்றாய்.
 
வயிற்றில் அமிலம்
வாயில் நஞ்சு
எரிக்கும் தழல்
உடற்சூடு
விண்ணையும்
மண்ணையும்
உண்டு வாழும்
 
நீ உயிர்
நீ யாக்கை
நீ வாழ்வு
 
மரணம் 
உனக்கில்லை
மரணம்
உனக்கில்லை
 
ஏனெனில்
நீ
மரணத்தில்
மலர்ந்த
மாமொட்டு
 
ஆம்,
 
நீ உயிர்
நீ யாக்கை
நீ வாழ்வு

மின்மினி

October 17, 2013

விண்ணின் மேலொரு

கண் வைத்துப் பார்த்த போது
கருமைப் பூச்சில்
மின்மினிகள்.
 
சில மின்னின
சில மங்கின.
 
கருமைதான்
பின்புலம்.
 
சோம்பலான வாழ்வில்
பட்டுத்தெறிக்கும்
பளிச்சென்ற பொழுதுகள்
மின்மினி போன்றவை
 
என
உணர்ந்த போது
பொறி தட்டியது!

கரை கடந்து போகும் வாழ்வு

October 17, 2013

காட்டாற்று

வெள்ளம் போல்
கரை கடந்து
பாய்கிறது வாழ்வு.
 
ஆயிரம் கண்கள்
பார்த்துக் கொண்டே
இருப்பது அறிந்தும்
நான் காணப்படாதவளாகவே
உணர்கிறேன்.
 
சுற்றிச்சுற்றி சுற்றம்
இருந்தும்
இழுத்துப் பூட்டிய
என் சிறைக்கதவுகள்
மூடிய வண்ணமே
இருப்பதேன்?
என வியக்கிறேன்!
 
கூட்டுப்புழு கூட்டுக்குள்
அடைபட்டு
இருக்கும்
எனக்கு
என்று சிறகுகள்
முளைக்கும்?
 
காலம் வந்து
இருந்தவரை
அள்ளிக்கொண்டு
போகிறது
வெள்ளத்தில்
புரண்டு கொண்டு
அபய கரம் தோன்றுமா?
என வானைப்பார்க்கும்
அபலை போல்
உணர்கிறேன்.
 
காட்டாற்று
வெள்ளம் போல்
கரைகடந்து போகிறது
வாழ்வு.

அணுகக்கூச்சல்

October 11, 2013

கும்பலும் கூச்சலுமான
பிளிறலுடன் உலாவும்
யானைகள்
நொடிப்பொழுதில்
மௌனித்து
சிலையாகி விடுகின்றன.

மனிதச் செவிக்குட்படாத
அலைவரிசையில்
வரும் சேதியைக்
கேட்க அந்த அமைதியாம்.

அந்தி சாய்ந்து
ஆழ் இருளில்
உலகு தவழ்ந்திருக்கும்
வேலையில்தான்
எம் வேதனைகளும்
அவஸ்தைகளும்
மெல்ல மேலெழும்பி
வதைக்கத்தொடங்குகின்றன.

சின்ன அதிர்வலைகூட
ஒலிபெருக்கி வைத்து
ஊதுவது போல்
உள்ளே
பெருக்கமடைய…

கனவுகள் அதை
உள் வாங்கி
நாடகமாக்கி
ஊதிப் பெருக்கி
உவப்பிலும்
வெண்நரகிலும்
போட்டு வதக்கி
பிழிந்து எடுக்கும்
போது உடலார்
வேர்த்து விறுவிறுத்து
தொப்பலாகி
முழிக்கும் போது

வேறொரு பரிமாணத்தின்
அலகுகள் புலப்படுகின்றன.

இதனால்
இதனால் தான்
இரவுகளை
அணுகக்கூச்சமாக
உள்ளது.